Hernasien-sperdatum naby vir matrieks
2013-01-05 12:58
Johannesburg – Leerders wat nie hulle matriekjaar suksesvol voltooi het nie, het slegs tot 21 Januarie om te registreer vir die hermerk of hersiening van antwoordstelle, het Angie Motshekga, minister van basiese onderwys, Saterdag gesê.
Motshekga het in 'n brief aan matriekleerders gesê kandidate wat nie geslaag het nie, kan aansoekvorms vir dié proses by die skole en sentrums waar hulle eksamen geskryf het, afhaal.
Die hernasien van 'n vraestel kos R73, terwyl die hersiening van 'n vraestel R14 beloop. Dit kos R153 om 'n antwoordstel te sien wat 'n tweede keer nagesien is.
Kandidate by gratis skole en leerders wie se ouers om finansiële hulp aansoek gedoen het (en dit toegestaan is), hoef nie te betaal vir die hermerk van vraestelle nie, het Motshekga gesê.
Leerders sal ook in staat wees om vir aanvullende eksamens aansoek te doen. Hulle kan dit doen deur teen 21 Januarie daarvoor te registreer by die skole of sentrums waar hulle eksamen geskryf het.
– Volg Nuus24 op Twitter.
- SAPA
