Henning-veroordeelde 'nie 'n moordenaar'

2012-11-29 14:37

Pretoria – Die veroordeelde moordenaar Willem Pieterse het Donderdag in die Pretoriase hooggeregshof gesê dit is nie in sy geaardheid om moord te pleeg nie.

"Ek kon haar net nie skiet nie. Dit is nie in my geaardheid om mense te vermoor nie," het hy gesê oor die moordpoging op die Pretoriase ma Chanelle Henning.

"Ek was slegs die motorfietsbestuurder. Ek is nie die leier nie."

Pieterse het getuig in die verhoor van Ambrose Monye en André Gouws.

Hulle staan tereg op aanklagte van moord, sameswering om moord te pleeg, sameswering om 'n onwettige vuurwapen en ammunisie te koop en die besit van 'n onwettige vuurwapen en ammunisie. Monye en Gouws het onskuldig gepleit.

Twee mans op 'n motorfiets het die 26-jarige Henning doodgeskiet kort nadat sy haar seun by 'n kleurskool afgelaai het.

Pieterse en Gerhardus du Plessis, ook 'n voormalige polisiebeampte, beweer Monye het hulle gehuur om Henning dood te skiet en onderneem om hulle elk R10 000 te betaal.

Albei het verlede jaar 'n pleitooreenkoms met die staat aangegaan en is tot 18 jaar tronkstraf gevonnis vir hul aandeel in die moord.

Daan Mostert, vir Gouws, het Pieterse ondervra oor sy besluit om deel te neem aan die moord.

"Ek het glad nie gedink nie. Ek het dit net gedoen."
      
– Volg Nuus24 op Twitter

- SAPA