Henning-seuntjie moes moord nie sien
2011-12-15 07:31
Pretoria – “The bitch has the baby this weekend.”
Dié woorde van die vermeende meesterbrein agter die sluipmoord op Chanélle Henning het haar dood met ’n paar dae uitgestel, want die opdrag was duidelik: Die jong ma mag nie geskiet word as haar seuntjie, Benjamin (4), by was nie.
Dít was van die getuienis wat Woensdag in die Pretoriase streekhof uitgekom het tydens die pleit- en vonnisverrigtinge van die twee mans wat Henning op 8 November geskiet het.
Luidens nog getuienis het een van die samesweerders wat wou kop uittrek ’n polisieman gevra om hom te kom sien. Hy wou hom oor die moordkomplot inlig. Die polisieman het nie opgedaag nie.
Henning is twee maal geskiet. Die skoot in haar bors het haar dood veroorsaak.
Willem Martinus (Pike) Pieterse en die oudpolisiekonstabel Gerhardus du Plessis is elk R10 000 vir dié sluipmoord belowe. Hulle het gister volgens ’n pleitooreenkoms skuld beken op aanklagte van moord en die onwettige besit van ’n vuurwapen en ammunisie. Albei is effektief tot 18 jaar tronkstraf gevonnis.
Die mans het gelate gelyk terwyl adv. Gerrie Nel, staatsaanklaer, die feite volgens hul pleitverduidelikings aan die hof verduidelik het.
Du Plessis en Pieterse het in Julie vanjaar bevriend geraak.
Pieterse het vertel dat hy mnr. Ambrose Monye in Oktober ontmoet het deur ’n persoon genaamd Sly, ook bekend as Rude Boy, en vir Monye werk vir ekstra geld gedoen het.
Monye het glo vir Pieterse en Du Plessis gesê iemand wou ’n persoon “uithaal”.
Dis toe dat hulle, luidens hofstukke, vir André Gouws, glo ’n vriend van Henning se vervreemde man, ontmoet het.
Gouws het toe vir Henning reeds twee weke lank agtervolg, het die mans gesê.
Hy het ook opdrag gegee dat Henning nie voor die kind geskiet moet word nie. Die sluipmoord is vir die naweek van 5 en 6 November beplan.
Maar tydens ’n ontmoeting met Gouws was hy besig met ’n telefoonoproep. Du Plessis het die persoon aan die ander kant hoor sê: “The bitch has the baby this weekend.”
Henning se moord is na die Maandag verskuif.
Intussen het Pieterse en Du Plessis stry gekry en Pieterse het toe probeer om self vir Henning te skiet.
Hy moes egter die plan laat vaar weens ’n ongeluk met sy motorfiets.
Intussen het Du Plessis die polisieman probeer nader. Sly het daarvan gehoor en het hom gedreig sy familie sal van kant gemaak word.
Op 8 November het die twee mans op Pieterse se motorfiets vir Henning by Benjamin se kleuterskool gewag.
“Die oorledene het in haar kar geklim. Du Plessis het van die motorfiets afgeklim en nader gestap. Hy het twee skote na haar geskiet terwyl sy probeer wegjaag het.”
– Volg Nuus24 op Twitter
- Beeld