Henning-moordverhoor wéér uitgestel

2012-11-21 14:27

Johannesburg – Die saak teen twee mans wat daarvan beskuldig word dat hulle Chanelle Henning vermoor het, is tot Maandag in die Noord-Gautengse hooggeregshof uitgestel, berig Eyewitness News.

Regter Johan Kruger het Woensdag toegelaat dat André Gouws vir die laaste keer 'n regsverteenwoordiger aanstel, en gewaarsku dat geen meer uitstel aan hom toegestaan gaan word nie.

Henning is in November verlede jaar doodgeskiet – oomblikke nadat sy haar seun by sy kleuterskool in Faerie Glen, Pretoria, afgelaai het.

Adv. Gerrie Nel, staatsaanklaer, het gesê dit wil voorkom asof Gouws die regsproses en sy reg op regsverteenwoordiging misbruik om die saak te vertraag.

Nel het gesê die staat is gereed om voort te gaan.

'n Advokaat van die Regshulpraad het aan die hof gesê 'n nuwe regsteenwoordiger sal teen Vrydag aangestel word om Gouws te verteenwoordig. Dít nadat hy verlede week sy regsverteenwoordigers in die pad gesteek het.

Gouws en die voormalige Nigeriese Olimpiese atleet Ambrose Monye word van die moord op Henning beskuldig.

– Lees meer hier
       
– Volg Nuus24 op Twitter