Henning-beskuldigdes weer in die hof
2012-11-28 08:18
Johannesburg – Die verhoor van twee mans wat daarvan beskuldig word dat hulle Chanelle Henning vermoor het, sal Woensdag in die Pretoriase hooggeregshof voortduur.
Dinsdag het die voormalige polisiebeampte Willem Pieterse, wat vir sy rol in die moord gevonnis is, aan die hof gesê Ambrose Monye moet die waarheid vertel oor Henning se moord.
Monye, 'n voormalige Nigeriese Olimpiese atleet, en André Gouws staan tereg op aanklagte van moord, sameswering om moord te pleeg, sameswering om 'n onwettige vuurwapen en ammunisie te koop en die onwettige besit van 'n vuurwapen en ammunisie. Hulle het onskuldig gepleit.
Pieterse en Gerhardus du Plessis, ook 'n voormalige polisiebeampte, beweer Monye het hulle gehuur om Henning dood te skiet en onderneem om hulle elk R10 000 te betaal.
Albei het verlede jaar 'n pleitooreenkoms met die staat aangegaan en is tot 18 jaar tronkstraf gevonnis vir hul aandeel in die moord.
Matthew Klein, vir Monye, het aan Pieterse gesê die enigste werk waarvoor sy kliënt hom ooit gehuur het, was geringe sekuriteitswerk.
"Ja, ek het werk vir hom gedoen. Dit was om dwelms te verkoop en om Chanelle te vermoor en dit was nie gering vir my nie," het hy geantwoord.
Hy het aan die hof gesê Monye en Gouws het op verskeie geleenthede met hom en Du Plessis ontmoet om Henning se moord te bespreek. Tydens een van die ontmoetings het Gouws hulle gewaarsku dat Henning se kind nie moet seerkry nie.
Twee mans op 'n motorfiets het die 26-jarige Henning op 8 November doodgeskiet kort nadat sy haar seun by die kleuterskool afgelaai het.
– Volg Nuus24 op Twitter
- SAPA
