Henning-moordbeskuldigde in hof vir korrupsie
2011-12-09 14:35
Pretoria – Die geskorste Pretoriase polisiebeampte wat in verband met die moord op Chanelle Henning in hegtenis geneem is, het in die hof verskyn vir korrupsie, berig Pretoria News.
Gerhardus du Plessis het Donderdag op aanklag van korrupsie in die gespesialiseerde handelsmisdaadhof verskyn. Dié aanklag hou verband met 'n gesteelde dossier.
Hy is deur Donald du Plessis van die Regshulpraad verteenwoordig.
Sy vorige regsverteenwoordiger het hom tydens sy laaste hofverskyning in November aan die saak onttrek.
Die hof het gehoor dat die 34-jarige Gerhardus, wat ook teregstaan op aparte aanklagte van sameswering om moord te pleeg, moord en die onwettige besit van 'n vuurwapen en ammunisie, sy borgtogaansoek in die Henning-moordsaak laat vaar het en in pleitonderhandelings met die staat is.
Die aanklag van korrupsie en dié van moord hou nie verband met mekaar nie.
Sy regsverteenwoordiger het gesê dit sal nutteloos wees om borgtog in die korrupsie-saak in te stel omdat sy kliënt op moordaanklagte by die Garsfontein-polisiekantoor aangehou word.
Ná 'n versoek deur Donald du Plessis, het die hof ingestem dat die staat 'n R2 000, wat Gerhardus se broer vir borgtog betaal het, aan hom terugbetaal.
Die hof het ook ingestem om die aanklagte van korrupsie met die ander aanklagte saam te voeg.
– Volg Nuus24 op Twitter
- SAPA