Henning-moord: Saak staan oor, verdagte 'moeg'

2012-11-28 12:54

Pretoria – Die verhoor van twee mans wat van die moord op Chanelle Henning aangekla word, het Woensdag in die stad se hooggeregshof oorgestaan.

Een van die beskuldigdes, André Gouws, het gekla hy kon nie konsentreer nie, aangesien hy te min geslaap en geëet het.

Sy regsverteenwoordiger, Daan Mostert, sê sy kliënt kon nie met sy notas byhou nie en het tydens die hofverrigtinge aan die slaap geraak.

“Hy is nie daartoe in staat om voor te berei nie.”

Mostert het ook die regter gevra om sy kliënt toe te laat om in ‘n enkel-sel te bly.

Waarnemende regter Johan Kruger sê die regspanne moet die probleem met die departement van korrektiewe dienste bespreek en aan hom terug rapporteer.

Gouws en die voormalige Nigeriese Olimpiese atleet Ambrose Monye staan tereg op aanklagte wat moord en sameswering tot moord insluit. Albei het onskuldig op al die aanklagte teen hulle gepleit.

Henning is verlede jaar tydens 'n sluipmoord in Faerie Glen, Pretoria, doodgeskiet kort nadat sy haar seun by die kleuterskool afgelaai het.

Volg Nuus24 op Twitter

- SAPA