Henning-moord: Nico is nié in aanhouding
2012-01-19 11:01
Johannesburg – Chanelle Henning se vervreemde man is teen Donderdagoggend nog nie in hegtenis geneem nie, het die polisie in Gauteng gesê.
“Nico Henning is nie in hegtenis geneem nie, ek kan niks meer as dit sê nie,” het lt. kol. Katlego Mogale gesê.
Die polisie het mnr. Henning kort ná sy vervreemde vrou op 8 November in Faerie Glen doodgeskiet is ondervra, maar hy is vrygelaat sonder dat hy aangekla is.
Mogale sê hy kan nie bekend maak of daar planne is om Henning in hegtenis te neem nie.
Sy het Woensdag bevestig dat die polisie inligting opvolg nadat dit in die hof aan die lig gekom het dat hy ‘n verdagte is.
Die polisie se belangstelling in mnr. Henning het Dinsdag weer opgevlam toe die ondersoekende beampte kapt. Petrus van der Spuy in die Pretoria-streekhof getuig het dat “die meesterbrein” agter die moord steeds op vrye voet is.
Hy het nie die persoon wat verdink word se naam genoem nie, maar het verwys na oproepe wat van Henning se foon na die moordbeskuldigde André Gouws gemaak is.
Gouws, Gerhardus du Plessis, Ambrose Monye en Preshan Singh is in November in verband met die moord in hegtenis geneem.
– Volg Nuus24 op Twitter
- SAPA