Hengelaars dok dalk nie baie op
2010-03-08 08:16
Marelize Barnard
Kaapstad. - Die “straf”-permitte vir sporthengel en ander mariene verwante aktiwiteite wat luidens die Staatskoerant van 1 Mei met tot 500% verhoog word, gaan ná al die drama, onsekerheid en woede dalk nie eers meer geïmplementeer word nie.
Zolile Nqayi, woordvoerder van mariene en kusbestuur (MKB), het gister gesê hoewel die datum vir implementering luidens die kennisgewing in die Staatskoerant as 1 Mei aangedui word, “kan dit later wees”.
Terwyl duisende hengelaars steeds landwyd mobiliseer in hul verset teen die voorgestelde tariefverhogings, het Nqayi ook nou in dié laat stadium bevestig die verhogings kan “dalk net verwant wees aan die verbruikersindeks” eerder as die uitermatige verhogings wat in die Staatskoerant se kennisgewing uiteengesit is.
Asof die deurmekaarspul nie erg genoeg is nie, is die kennisgewing wat op 29 Januarie in die Staatskoerant gepubliseer is, onderteken deur die minister van water en omgewingsake, Buyelwa Sonjica. Tina Joemat-Pettersson, minister van landbou, bosbou en visserye, is van 1 April af verantwoordelik vir mariene sake.
Die finale aanbeveling deur die amptenary van die huidige mariene en kusbestuur oor die verhogings van permitte gaan aan albei die ministers gestuur moet word.
Tot die besluit oor die verhogings dan deur Joemat-Pettersson geneem moet word, geld die huidige permittariewe.
Volgens Nqayi is die gesprekvoering met betrokkenes in die hengelbedryf nog nie verby nie. Die geleentheid vir die indiening van geskrewe voorstelle het op 1 Maart gesluit, maar MKB het Vrydag ’n opvolgvergadering in KwaZulu-Natal gehad met rolspelers en nog ’n ontmoeting gaan in Port Nolloth gehou word.
Luidens ’n verslag deur die Suid-Afrikaanse Diepsee-Hengelvereniging (SADSAA), met 8?000 geregistreerde lede, word die verhoogde permittariewe beskryf as strafpermitte wat onrealisties, onvolhoubaar en onaanvaarbaar is.
Die verhoogde tariewe gaan volgens insette aan die MKB misdadigers maak van gewone wetsgehoorsame mense, omdat armer mense van veral kusgemeenskappe wie se vangste hul voedselsekerheid is nie die verhoogde tariewe kan bekostig nie.
Cary Steele-Boe, voorsitter van Sport-hengeldienste, het gister gesê dit is onnodig om mense só te toets. Die kennisgewing moes in die eerste plek nie in die Staatskoerant verskyn het nie, omdat dit ’n voorstel was. “Die kwaad is klaar gedoen. Die publiek weet nie wat aangaan nie.”
- Die Burger