Hele dorp werk saam om rowers vas te trek
2013-01-21 09:10
Johannesburg – Die Meyerton-gemeenskap het die dorp oor die naweek afgesper om vyf mans te soek wat probeer het om by ‘n huis in te breek terwyl ‘n vrou en haar kinders daar was, het ‘n berig Maandag gelui.
“Ek en my kinders was alleen by die huis toe die honde buite tekere gegaan het. Ek het gaan ondersoek instel en daar was vyf mans by die voordeur, elk met ‘n gereedskapstuk in sy hand,” het die vrou, wat anoniem wou bly, aan Beeld gesê.
“Ek het op hulle geskree, maar hulle het my geïgnoreer en het aangehou om die sekuriteitshek te probeer afbreek,” het sy gesê.
Sy het haar man gebel, wat net daar aangekom het toe die rowers wegjaag. Hy het hulle glo agternagesit en teen hul motor vas gejaag, maar hulle het weggehardloop.
Die vrou het gevolglik die plaaslike gemeenskapspolisiëringsforum gekontak.
“Al die gemeenskapspolisiëringsforums in Meyerton het gereageer,” het Riette McKenzie, ‘n woordvoerder vir die Golfpark-tak, gesê.
Mense het lyne van soekgeselskappe in die strate gevorm en residensiële blokke afgesper totdat die rowers, wat in die veld weggekruip het, gevind is.
– Volg Nuus24 op Twitter
