'Heksery geen verskoning vir moord'
2012-02-02 16:01
Durban – Die regering in KwaZulu-Natal het Donderdag die moorde op mense wat van heksery verdink word veroordeel.
“Ons doen ‘n beroep op ons mense om nooit heksery as ‘n verskoning te gebruik om moord te pleeg nie,” het die premier, dr. Zweli Mkhize, gesê.
Hy het gesê lede van die provinsiale uitvoerende raad het Woensdag tydens sy vergadering gemeenskappe aangemoedig om op te hou om diegene wat van heksery verdink word dood te maak.
In die jongste voorval in die provinsie is Masisi Mhlongo (50), Fanelesibonge Ntuli, (6) en Amahle Nxumalo (5) in Maphumulo doodgemaak nadat Mhlongo daarvan beskuldig is dat sy ‘n heks is.
‘n Bejaarde paartjie, Rafael Zikhulu en Elsa Dubazane, is onlangs in Lindelani, noord van Durban, vir dieselfde rede vermoor.
– Volg Nuus24 op Twitter
- SAPA