Hek by Gautrein slaan op seuntjie (3) se kop toe
2011-08-16 07:02
Pretoria – Die bestuur van die Gautrein gaan ’n voorval ondersoek waarin ’n toegangshek by die stasie op ’n driejarige seuntjie se kop toegeslaan en dit vasgeknyp het.
Cornell Tome van Wierdapark, Centurion, het Maandag gesê hy en sy vrou, Liezel, en hul seuntjie (3) het Woensdag ná ’n vakansie in die Kaap met die Gautrein van die O.R Tambo-lughawe na Centurion gery. Hulle wou nie hul seuntjie se naam verstrek nie.
’n Familielid het die gesin by die Centurion-stasie ingewag. Die seuntjie het toe na dié familielid aan die anderkant van die hek gegaan.
“Hy het vinnig omgedraai en begin terughardloop na ons toe, toe die glasdeure meteens toegeslaan het. Dit het hom van sy voete af geslaan en sy kop vasgeknyp.”
’n Veiligheidsbeampte het glo nader gekom toe die kind begin gil het en het glo vir die Tomes gesê dat ouers hulself moet oplei om die trein te gebruik sodat sulke goed nie gebeur nie. Die hek is oopgemaak en die kind is bevry. Sy ore was glo rooi.
Volgens Tome is daar nêrens enige waarskuwings op oor die hekke wat toeklap nie.
Errol Braithwaite, woordvoerder van Bombela, die konsortium wat die Gautrein bedryf, het gesê daar is verskeie kanale, waaronder stasie-kliëntediens-personeel, die inbelsentrum, Gautrein-webtuiste en selfs gelyste telefoonnommers waar pendelaars klagtes kan aanmeld.
“Ek is baie ontsteld om te hoor van die voorval waarby dié seuntjie betrokke was.
“Ons vra om verskoning vir watter mate ook al ons verantwoordelik hiervoor was.”
Volg Nuus24 op Twitter.
- Volksblad