Hegte paar sterf saam
2011-11-16 08:05
Pretoria – In ’n moderne Romeo en Juliet-verhaal het ’n bejaarde vrou haarself in die hart geskiet nadat sy op haar man se lyk afgekom het oomblikke nadat hy homself geskiet het.
Gloria du Toit (77) het die vuurwapen opgetel waarmee haar man, Theuns du Toit (79), homself geskiet het en haarself op haar bed langs hom in die hart geskiet.
Twee vriendinne het vergeefs probeer keer.
Inez Schonken, verpleegbestuurder van die Amandasig-aftreeoord in die noorde van Pretoria, het gesê alles het net te vinnig gebeur.
“Hulle het altyd gesê hulle wil nie sonder mekaar leef nie. Sy kon nie sonder hom nie en hy kon nie sonder haar nie.
“Die twee mensies was net klaar met die wêreld. Hulle was alleen en wou net basies ’n einde aan hul lewe maak.”
Dié tragedie het homself Dinsdag omstreeks 06:00 in huis nommer 70 afgespeel.
Ao. Annerie Robinson, polisiewoordvoerder, het gesê mnr. Du Toit het homself in die kop geskiet, waarna mev. Du Toit haarself in die hart geskiet het.
Schonken het gesê mnr. Du Toit het homself eerste geskiet. Sy vrou was vermoedelik in die badkamer besig toe sy die skoot hoor.
Nadat mev. Du Toit haar man se lewelose liggaam gesien het, het sy twee vriendinne, wat naby haar woon, geroep om haar kinders te bel. Dié twee vriendinne is albei in die 70’s.
“Al wat mev. Du Toit vir haar vriendinne gesê het, was dat hulle haar kinders moet bel. Hulle het by haar in die slaapkamer, waar haar man gelê het, gestaan. Die een het nog probeer om met haar te praat, maar alles het te vinnig gebeur,” het Schonken gesê.
“Daar voor hulle het sy die vuurwapen opgetel en haarself geskiet.”
Schonken het gesê die twee vroue is baie getraumatiseer en het Dinsdag berading ontvang, asook ’n besoek van ’n predikant.
Volgens Schonken is al die inwoners van die aftree-oord geruk deur die gebeure.
Die Du Toit-egpaar was van die eerste inwoners van die oord toe dit 22 jaar gelede oopgemaak het. Hulle het lang paadjies geloop saam met meeste van die inwoners.
Schonken het gesê die Du Toit-egpaar was baie stil, rustige en teruggetrokke mense.
Hulle het geen briewe gelos nie.
Die Du Toit-egpaar se drie kinders het, nadat hulle die nuus van hul ouers se dood gehoor het, na die huis gegaan waar hulle almal gisteraand geslaap het.
Robinson het gesê die polisie doen ’n geregtelike doodsondersoek.
Volg Nuus24 op Twitter
- Volksblad