Heelwat meer soldate binnekort op grense
2011-02-23 18:00
Kaapstad - Meer as ‘n miljard rand ekstra is hierdie jaar in die begroting opsygesit om beter grensbeheer toe te pas, het minister Pravin Gordhan Woensdag tydens sy begrotingsrede in die parlement bekendgemaak.
Hieruit sal R600 miljoen in die volgende drie jaar beskikbaar gestel word om meer soldate op die land se grense te ontplooi, en om grensbeheer-fasiliteite en -toerusting op te gradeer en te onderhou, het Gordhan gesê.
Die hoeveelheid weermaglede wat op grense ontplooi is sal toeneem van 1 168 in 2011/12 tot 2 158 in 2013/14.
Die departement van verdediging sal in die volgende finansiële jaar 'n totaal van R1,3 miljard ekstra tot sy beskikking hê om onder andere grensbeheer toe te pas, is in die begrotingsrede gesê.
"Die departement van verdediging sal R1,3 miljard ekstra ontvang in 2011/12, R1,6 miljard in 2012/13 en R2 miljard in 2013/14," het Gordhan gesê. Dit sal die besteding deur dié departement teen die 2013/14-boekjaar op sowat R43.9 miljard te staan bring.
Die ekstra geld wat bewillig is sal ook gebruik word om vredessendings moontlik te maak en om misdaadintelligensie op ‘n streeksvlak te verbeter.
- Volg Nuus24 op Twitter