'Heath se kop sal nie sommer rol'
2011-12-14 08:30
Kaapstad – Dis onwaarskynlik dat oudregter Willem Heath sal “sneuwel” in die ondersoek wat tans teen hom aan die gang is.
Prof. André Duvenhage, politieke ontleder aan die Noordwes-Universiteit, het Dinsdag by navraag gesê hy dink nie ’n “kliniese besluit” sal oor dié nuut aangestelde hoof van die spesiale ondersoekeenheid (SOE) geneem word nie.
“Ek verwag eerder ’n verlengde proses – soos dat daar van hom verwag sal word om met bewyse vorendag te kom, maar dat hy toegelaat sal word om met sy werksaamhede by die SOE voort te gaan.
“As hy letterlik afgedank word voordat hy begin werk, sal dit ’n groot verleentheid vir pres. Jacob Zuma wees.”
Dit sal veral ’n verleentheid wees in die lig van die hofuitspraak dat adv. Menzi Simelane se aanstelling as nasionale direkteur van openbare vervolging onwettig was, asook Zuma se besluit om regter Mogoeng Mogoeng as hoofregter aan te stel.
Zuma het Jeff Radebe, minister van justisie, verlede week gevra om Heath se uitsprake te ondersoek.
Heath het oudpres. Thabo Mbeki twee weke gelede in ’n koerantonderhoud daarvan beskuldig dat hy voor die ANC-leierskapstryd in 2007 in Polokwane ’n aandeel gehad het aan die aanklagte van verkragting en korrupsie teen Zuma.
Heath het onder meer gesê regter Hillary Squires se hofuitspraak teen die veroordeelde bedrieër Schabir Shaik, Zuma se voormalige finansiële raadgewer, was “gebrekkig”.
Squires het Shaik in 2005 tot 15 jaar tronkstraf gevonnis weens korrupsie en bedrog.
Mbeki het die regering, as Heath se werkgewer, uitgedaag om sy bewerings te bewys.
Heath het reeds tersaaklike inligting oor dié kwessie vir oorweging aan Radebe se kantoor oorhandig.
Hy het volgens die departement van justisie gesê hy het die onderhoud in sy persoonlike hoedanigheid toegestaan en nie as hoof van die SOE nie.
Tlali Tlali, woordvoerder vir Radebe, het gister gesê Heath se lot sal reeds vandeesweek bekend wees.
– Volg Nuus24 op Twitter
- Die Burger