Heath kan weer vir Jeff Radebe werk
2011-12-18 08:05
Johannesburg – Oudregter. Willem Heath, voormalige hoof van die spesiale ondersoekeenheid (SOE), kan heraangestel word as die hoof-regsraadgewer van Jeff Radebe, minister van justisie.
Heath het as Radebe se spesiale raadgewer bedank toe hy 20 dae gelede deur pres. Jacob Zuma as hoof van die SOE aangestel is.
Hy het die afgelope week bedank nadat sy werk “onhoudbaar” geraak het.
Twee dae ná sy aanstelling het Heath in ’n onderhoud met City Press, susterkoerant van Rapport, gesê hy glo Zuma was die slagoffer van ’n sameswering wat deur oudpres. Thabo Mbeki en adv. Bulelani Ngcuka, gewese vervolgingshoof, gedryf is.
Radebe sê in ’n verklaring wat Heath se bedanking aankondig: “Ons wil graag adv. Heath bedank vir die bekwaamheid en waardering wat hy getoon het nadat die indruk, reg of verkeerd, met sy aanstelling gewek is dat hy nie in die posisie is om sy pligte op ’n onafhanklike manier uit te voer nie.”
Radebe, ’n bondgenoot van Zuma, het Heath in 2009 ná die nasionale verkiesing as sy spesiale regsraadgewer aangestel.
Op die vraag of Radebe dit sal oorweeg om Heath wéér aan te stel nadat hy as hoof van die SOE bedank het, sê Tlali Tlali, woordvoerder van die departement van justisie, die minister “moet nog daaroor dink”.
Radebe het nie op spesifieke vrae gereageer nie, soos of hy geweet het van Heath se siening oor Mbeki se rol in die anti-Zuma-“sameswering”.
“Ons het verklarings uitgereik waarin dit duidelik gestel word dat die kommentaar van adv. Heath in sy persoonlike hoedanigheid gedoen is,” het Tlali gesê. “Sy kommentaar het dus niks met die regering te doen nie.”
Tlali sê die pos van spesiale raadgewer hoef nie geadverteer te word nie. “Die minister sal nog besluit of hy die advokaat wil heraanstel en of hy op iemand anders besluit.”
Op ’n vraag of Radebe ondersoek sal instel na Heath se bewerings oor betalings wat “weggesteek” is en “wat gesien kan word” as omkoopgeld namens die oorlede mynmagnaat Brett Kebble, sê Tlali: “As die samewerking van adv. Heath met die Kebbles enigsins met ’n strafregtelike oortreding te doen het, sal dit deur die toepaslike mense ondersoek word.”
- Rapport