Hartbeesfontein-plaasmoord skok wyd

2012-08-13 22:02

Hartbeesfontein – Die koelbloedige plaasmoord in die Hartbeesfontein-distrik in die Noordwes het as ‘n groot skok gekom omdat plaasveiligheid in die distrik ‘n groot prioriteit vir boere is.

André Kilian, voorsitter van Hartbeesfontein-landbouvereniging se veiligheidskomitee, sê hulle betreur die moord op Ronel van Eyk, wat Maandagoggend deur drie mans buite haar huis op die plaas Witklip geskiet is.

OFM berig die polisie ondersoek nog die motief vir die moord, maar Kilian sê daar bestaan 'n vermoede dat die verdagtes agter geld in Van Eyk se motor aan was.

Van Eyk is met haar aankoms by die hospitaal dood verklaar.

“Sy is in die wang, arm en bors geskiet voordat die mans met haar wit Toyota Venture gevlug het,” het brig. Thulani Ngubane vroeër aan Sapa gesê.

Die polisie is nog op soek na die aanvallers.

Volg Nuus24 op Twitter