Hartbaba se gesin kan nie wag dat sy huis toe kom
2010-02-09 08:29
Susan Cilliers
Johannesburg - Klein Ashleigh-Karin Louw het gister haar eerste mylpaal gevier: sy het ’n maand oud geword en was wakker genoeg om vir haar familie te kyk en haar ledemate te beweeg.
Dié baba word sedert haar geboorte in die Chris Hani Baragwanath-hospitaal in Soweto se neonatale waakeenheid versorg.
Sy is gebore met Pentalogie van Cantrell, ’n voorgeboortelike ontwikkelingsafwyking wat veroorsaak dat onder meer die maagwand en borsbeen nie behoorlik sluit nie. Lyers word gevolglik dikwels met ’n gedeelte van die hart en ingewande buite hul borskas gebore. Die hart is dikwels, soos ook in Ashleigh-Karin se geval, misvorm.
Haar ma, Anastacia Louw, het gister gesê hulle is baie positief en dat dit onder omstandighede goed gaan met dié jongste dogter van haar en haar man, Jonathan.
Die wonde van ’n operasie wat sy kort ná geboorte gehad het, is aan die genees. In dié operasie is Ashleigh-Karin se maagwand, diafragma en borsbeen sover moontlik herstel en die ingewande en gedeelte van haar hart wat uitgesteek het, in haar borskas teruggedruk.
Louw het gesê hoewel sy aan haar baba kan raak, frustreer dit haar dat sy haar nog nie kon vashou en vertroetel nie. Tuis wag haar kleertjies op haar. Ashleigh-Karin se twee sussies en boetie kan ook nie wag dat sy huis toe kom na die res van die gesin in Eldoradopark nie. “Maar ons hou haar goedjies vir haar gereed.”
Louw waak elke dag by haar jongste kind. “Ons moet maar net cope. Wat anders kan ons doen as net te bid?”
Wanneer Ashleigh-Karin ouer is, sal sy ’n paar hartoperasies ondergaan om haar hartfunksie te verbeter.
- Die Burger