'Hartbaba kan sterf'
2010-01-19 07:07
Retha Grobbelaar
Baba Ashleigh-Karin Louw, wat met ’n deel van haar hart buite haar borskas gebore is, is baie siek, maar bestendig.
So het prof. Sithembiso Velaphi, hoof van die neonatale eenheid by die Chris Hani Baragwanath-hospitaal in Soweto, gister op ’n mediakonferensie by dié hospitaal gesê.
Ashleigh-Karin is eergister geopereer, onder meer om haar hart sover moontlik in haar borskas terug te druk.
Johannesburg - Dr. Aaron Motsoaledi, minister van gesondheid, Edna Molewa, minister van maatskaplike ontwikkeling, en Qedani Mahlangu, Gautengse LUR vir gesondheid en maatskaplike ontwikkeling, het Ashleigh-Karin Maandag besoek.
Sy het Sondag ’n sowat drie uur lange operasie ondergaan waarin haar misvormde borsbeen gedeeltelik herstel is.
Haar misvormde maagwand en diafragma is ook herstel.
Ashleigh-Karin is 11 dae gelede met Pentalogie van Cantrell gebore. Dis ’n uiters seldsame ontwikkelingsafwyking wat abnormaliteite in die borsbeen, maagwand, diafragma en hart self veroorsaak.
Die ingewande kan ook, soos in Ashleigh-Karin se geval, deur die maagwand stoot.
Volgens Velaphi is sy steeds in die waaksaal.
“Ons vat dinge minuut vir minuut. Sy is steeds baie kritiek,” het hy gesê.
Dr. Jerome Loveland, hoof van pediatriese chirurgie by Bara-gwanath, moes die bedekking oor Ashleigh-Karin se hart gister omstreeks 01:00 tydens ’n operasie losser gemaak word om bloedvloei te vergemaklik.
Dié bedekking het druk op haar hart geplaas.
Loveland het gesê die volgende 48 tot 72 uur is baie belangrik.
“Al doen ’n mens alles reg, is daar ’n kans dat sy kan sterf,” het hy gesê.
- Beeld