Harrismith-moorde: Seun was al opgesluit
2012-11-10 15:04
Johannesburg – Die vermoorde dominee van Harrismith in die Oos-Vrystaat, Willem Brits, het onlangs 'n familieplaas in die Noord-Kaap geërf, het OFM-radio Saterdag berig.
'n Woordvoerder vir die Brits-familie, AJ Scherrer, het bevestig dat Brits hierdie plaas van sy ouers geërf het en oorweeg het om dit te verkoop en 'n plaas nader aan Harrismith te koop.
Die gemeeenskap was Vrydag geskok met die nuus dat 60-jarige Brits en sy aanstaande skoonseun, Gerhardus Vermeulen, Donderdagaand in die pastoriehuis vermoor is.
Brits se vrou, Dorothea, is in 'n kritieke maar stabiele toestand in die Mediclinic Bloemfontein nadat sy geopereer is.
Die eerste verdagte is reeds Donderdagaand aangekeer.
Die egpaar se 28-jarige seun is intussen ook in hegtenis geneem. Albei verdagtes sal Maandag in die dorp se landdroshof verskyn.
Scherrer het bevestig dat die paartjie se vier kinders aangeneem is, en dat die seun wat tans agter tralies is, reeds vantevore in die tronk was weens bedrog. Scherrer sê die ander drie kinders is tans in 'n plek van veiligheid om hulle teen die media te beskerm.
Polisiewoordvoerder Mmako Mophiring sê hoewel hulle aanvanklik na nog twee verdagtes gesoek het, is dié soektog vir eers afgelas.
Hulle sal na Maandag se hofverskyning duidelikheid hê of daar nog verdagtes betokke was.
Volg Nuus24 op Twitter.
