Regering wil praat oor handel in renosterhoring

2012-05-03 12:03

Kaapstad – Die internasionale gemeenskap sal moontlik genader word om voorstelle te bespreek oor die handel met renosterhorings.

Edna Molewa, minister van omgewingsake, het dié opmerking gemaak toe sy haar departement se begroting in die parlement ter tafel gelê het.

Volgens die nuutste syfers is 199 renosters al vanjaar onwettig vir hul horings doodgemaak, het Landbou.com berig.

Die Krugerwildtuin is steeds die grootste teiken met 119 renosters wat daar gestroop is. Die provinsies wat die meeste geteister word, is Limpopo, Mpumalanga, Noordwes en KwaZulu-Natal.

Molewa het gesê sy sal met plaaslike belanghebbendes vergader om nasionale konsensus te bereik oor voorstelle vir die Konvensie op die Internasionale Handel in Bedreigde Spesies (Cites) se vergadering wat in volgende jaar in Bangkok, Thailand, plaasvind.

Die belanghebbendes sal veral hul mening oor die oopstel van handel in die horings moet lug.

Lees meer hier

Volg Nuus24 op Twitter  

- Landbouweekblad