Handboek-sage: Zuma sal nie oorhaastig optree

2012-07-23 12:15

Kaapstad – Die regering sal nie oorhaastig optree teenoor Angie Motshekga, minister van basiese onderwys, oor die Limpopo-handboekkrisis nie, het pres. Jacob Zuma Maandag gesê.

Zuma het Maandag tydens 'n onderhoud op die radiostasie 567 CapeTalk gesê die regering het reeds stappe gedoen om die nie-aflewering van handboeke op te los, en sal nie enigeen afdank totdat die taakspan se ondersoek afgehandel is nie.

"Wanneer daar iets was, het ons aksie geneem. 'n Ondersoek vind nie oornag plaas nie... Ons moet regverdig optree," het hy gesê.

"Jy weet nie presies wie daarvoor verantwoordelik is nie. Jy kan nie sê die minister wat in haar kantoor in Pretoria sit, is verantwoordelik nie.

"Selfs al is sy die minister, moet sy uitvind presies wie verantwoordelik is vir die krisis... Die president moet die feite opweeg en dan besluit of dit sy was of nie."

Zuma het gesê hy kan nie spring elke keer as daar 'n berig in die media is nie.

"Ek is seker indien daar 'n berig was en ek het elke dag mense afgedank... sal mense sê ek volg nie die prosesse volgens die wet nie."

Hy het gesê die kabinet het aksie in Limpopo geneem lank voor die handboek-debakel, deur die departement van onderwys onder administrasie te plaas.

Dit het verlede jaar plaasgevind nadat die regering in Limpopo sy voorskot van R7 miljoen opgebruik het en probeer het om dit tot R1,7 miljard te vermeerder om salarisse in November te betaal.

Zuma het aan die radiostasie gesê onderrig is steeds die regering se topprioriteit, en ontvang die grootste begroting.

"Ek dink nie dit is reg om te sê dat ons dit nie 'n prioriteit maak nie... Ons is ook nie besig om vandag se probleem te hanteer nie, ons is besig om die probleem van apartheid op te los wat ons geraak het."

– Volg Nuus24 op Twitter

- SAPA