Hammerl 'was op sy gelukkigste'
2011-07-04 09:12
Johannesburg – “Jul pa was ’n groot man. Eendag as julle ouer is en sy asemrowende foto’s sien en hoor hoe mense oor hom praat, sal julle besef wie julle grootgemaak het.”
Dit was Saterdag die woorde van Mondli Makhanya, voorsitter van die Suid-Afrikaanse Nasionale Redakteursforum (Sanef), by die roudiens vir die fotograaf Anton Hammerl (41) in die His People-kerk in Parktown, Johannesburg.
Hammerl is op 5 April in Brega, Libië, noodlottig in die maag gewond.
Sy vrou, Penny Sukhraj, het Sondag gesê die gesin het sowat vyf jaar gelede na Engeland verhuis vir ’n beter lewe. Hy het onder meer daar by ’n universiteit klas gegee.
Kort ná die geboorte van hul derde kind het Hammerl ’n geleentheid gekry om twee weke lank na Libië te gaan om die “waarheid” oor kol. Muammar Ghaddafi se oorlog aan die wêreld te vertel.
“Ek het onwetend die aand voor sy dood met hom oor die internet gepraat,” het Sukhraj gesê.
“Hy het ’n stoppelbaard gehad, maar hy het gegloei en was op sy gelukkigste, want hy was besig om iets te doen waarvoor hy lief was.”
Sukhraj het by die roudiens gesê dit is die eerste keer wat sy in die verlede tyd oor haar man praat “Toe ek die nuus oor sy dood kry, het ek huilend op my knieë neergeval. Hoe moes ek sulke nuus aan ons kinders oordra?”
Sy het met trane in haar oë gesê hul jongste kind, Hiro (20 weke), het uiteindelik geglimlag en dat sy Hammerl se plek nou sal inneem om saam met Neo (7) en Aurora (11) fiets te ry, te gaan stap en te speel.
“Ek sal probeer om nie te gril as die seuns paddas optel nie en ek sal my bes probeer om hulle met dieselfde gevoel van avontuur, passie, liefde en respek vir die lewe en die mensdom te besiel as wat jy gehad het,” het Sukhraj gesê.
Foto’s van Hammerl se lewe is gewys van sy geboorte tot waar hy met Hiro in sy arms in die hospitaal geslaap het.
Huldeblyke deur onder andere twee van die drie joernaliste wat hom gesien sterf het, is in die kerk voorgelees.
“Ek is nie gereed om sonder jou te lewe nie, maar sal die kinders alleen probeer grootmaak. Ons almal mis jou verskriklik. Ek sal eendag weer saam jou wees,” het Sukhraj gesê.
– Volg Nuus24 op Twitter
- Beeld