Haffajee wil Miyeni nie meer dagvaar
2011-08-07 07:58
Johannesburg – Ferial Haffajee, redakteur van City Press, gaan nou eerder vir Eric Miyeni by die Menseregtekommissie (MRK) of die openbare beskermer (OB) verkla oor die rubriek die afgelope week waarin hy haar beswadder het.
Haffajee het vroeër gesê sy gaan Miyeni hof toe sleep nadat hy in sy rubriek Maandag in die dagblad Sowetan na haar verwys het as ’n “swart slang in die gras” wat deur “wit kapitaal ontplooi is om onmin onder swart mense te saai”.
Miyeni se rubriek onder die opskrif “Haffajee Does it for White Masters” het gevolg op berigte in City Press en Rapport oor die geldsake van Julius Malema, ANC-jeugleier.
In sy rubriek het Miyeni onder meer gesê: “Mense soos Haffajee … word soggens wakker en sien hul swart gesigte in die spieël net om ’n golf van selfhaat te ervaar wat hulle naar maak. In die 1980’s sou sy waarskynlik ’n brandende buiteband om haar nek gehad het.”
Sy en Miyeni kon ongelukkig nie tot ’n vergelyk kom wat op die waardes van ubuntu gegrond is nie, het Haffajee gister gesê.
“Hy glo dit was sy reg om te skryf; ek glo hy het met vrouehaat geflankeer en hom begeef in opruiende haatspraak – dit was ’n verbale fatwa. Daarom gaan ek ’n amptelike klag by die Menseregtekommissie of die openbare beskermer indien sodat ons dié pynlike kwessie kan oplos.”
Miyeni is intussen as rubriekskrywer afgedank en die waarnemende redakteur van die Sowetan ten tyde van die gewraakte rubriek, Len Maseko, het bedank.
In ’n verklaring het hy en Mondli Makhanya, hoofredakteur van Avusa Newspapers, gesê Miyeni het die grens tussen gesonde debat en die goedkeuring van geweld oorgesteek.
“Dis eie aan Suid-Afrika om ’n verskoning te aanvaar,” het Haffajee gesê. “Die Sowetan se verskoning was meer as voldoende. Ek sal ’n bitterbek wees as ek ’n hofsaak aanhangig maak. Ek wil nie. Eric Miyeni is sy werk kwyt en ek het nie twee jaar om in ’n hof te gaan staan nie.”
– Volg Nuus24 op Twitter.
- Rapport