Haal Hewitt uit heldegalery, eis versoekskrif
2011-12-10 07:10
Kaapstad. – ’n Aanlyn-versoekskrif is onlangs begin om die tennisgelegende Bob Hewitt uit die Internasionale Tennisheldegalery te verwyder oor bewerings dat hy meisies van so jonk as 11 en 12 jaar betas en selfs met hulle seks gehad het.
In die jongste uitgawe van Huisgenoot vertel vier Suid-Afrikaanse vroue wat in die 1980’s en 1990’s as jong meisies deur hom afgerig is van die beweerde dade.
’n Amerikaanse vrou het ook vroeër ’n soortgelyke bewering gemaak en dit is in Augustus vanjaar in die Amerikaanse koerant The Boston Globe gepubliseer. Nadat die vrou ’n klag van verkragting teen hom ingedien het, het nog vroue soortgelyke aantygings gemaak.
Hewitt (71), wat deesdae ’n sitrusbedryf op die Oos-Kaapse Karoo-dorpie Addo bestuur, is een van net twee Suid-Afrikaners wat in die Internasionale Tennisheldegalery opgeneem is. Die ander een is sy jare lange dubbelspelspanmaat Frew McMillan.
NIKS KEER VROUE
Op die aanlyn-versoekskrif, genaamd “Bob Hewitt: Paedophile who hides behind tennis”, het een van die ondertekenaars geskryf: “In die vroeë 1980’s het Bob Hewitt ons Oos-Transvaalse span ook afgerig. Sommige van die spelers is ook privaat deur hom afgerig. My goeie vriend en spanmaat het private sessies met hom gehad en sy was ook die slagoffer van sy walglike dade.
“Ek kan nie verstaan hoe dit deur die krake gegly het nie en dat daar tot op hede nog niks gedoen is nie. Ek is baie trots op die vroue wat nou praat en ek kan net dink hoe skadelik dit vir hulle is.”
Nog iemand het gesê: “Waar daar ’n rokie is, is daar ’n vuurtjie. Die gerugte kom al lank aan en ek wens dat daar al jare gelede iets daaraan gedoen is.”
Prof. Marinus Wiechers, ’n voormalige regsprofessor aan Unisa, het gesê in beginsel is daar niks wat die vroue keer om Hewitt aan te kla nie.
“Die probleem is egter hoe gaan ’n mens dit kan bewys? Enige hof sal bewyse wil hê. Mense kan nie alles onthou nie.”
Volgens hom sal die hof dalk ook eers wil weet waarom die vroue so lank gevat het om te kla.
William Booth, ’n prokureur wat in strafreg spesialiseer, het Wiechers se mening beaam.
Hy stem saam dat die saak nog aanhangig gemaak kan word, maar is dit met Wiechers eens dat onvoldoende bewyse die sake sal kniehalter.
Forensiese bewyse
“So ’n saak kan nog ná 30 of 40 jaar verhoor word, maar die beskuldigde sal kan aanspraak maak op sy grondwetlike reg tot ’n spoedige verhoor.
“Dalk het sommige van die getuies al gesterf, of is hulle landuit. Dit sal ook vir mense moeilik wees om te kan onthou wat op daardie spesifieke dag gebeur het,” het Booth gesê.
DNS-monsters en ander forensiese bewysstukke is nog ’n probleem, het hy gesê.
Hewitt het volgens Huisgenoot die afgelope maand glad nie gereageer op talle pogings om met hom te praat oor die vroue se aantygings nie.
Volg Nuus24 op Twitter.
- Die Burger
