Haai byt SA seun in Mosambiek
2009-12-24 07:33
Erika Gibson
Pretoria - ’n Seun van Suid-Afrika is vandeesweek in Mosambiek deur ’n haai aangeval terwyl hy beswaarlik 6 m van die strand in die golwe gespeel het.
Na wat vasgestel kon word, het die seun, wie se identiteit nie bekend is nie, die aanval oorleef. ’n Uitgevrete Zambezi-haai het hom in water wat nie dieper as 1 m is nie aangeval terwyl hy op sy branderplank in die golwe gespeel het.
Volgens Hettie Twiss van Johannesburg, wat in Ponta d’Ouro in die suide van Mosambiek vakansie gehou het, was daar eergistermiddag omstreeks halfvier ten tyde van die aanval “honderde” mense op die strand en in die water.
“Van die mans wat op die rotse naby die strand visgevang het, het ’n geskreeu gehoor. Teen die tyd dat hulle tot op die strand gehardloop het, het die seun – ek skat hom so 12 jaar oud – reeds op die sand gelê. Hy is erg aan sy sy en hand gebyt. Dit het kwaai gebloei. Iemand het noodhulp op hom toegepas.
“Dit het omtrent ’n uur geduur voordat ’n noodhelikopter opgedaag en hom weggeneem het hospitaal toe. Ek aanvaar hy is KwaZulu-Natal toe geneem, aangesien die naaste hospitale daar is.”
Volgens Twiss het ouers gehardloop om hul kinders uit die water te haal terwyl die haai nog in die baai by dié stranddorpie rondgeswem het.
“Mense op die strand wat die haai se vin gesien het, het gesê dit moet ’n uitgegroeide haai wees, want sy vin was groot.”
Volgroeide Zambezi-haaie is tussen 2 m en 3,5 m lank.
“Die oord-eienaars en van die plaaslike inwoners het aan ons gesê daar was in dekades geen haaie in die baai nie. Hulle was verstom dat ’n haai tot in die vlak water sou swem om iemand aan te val.
“Volgens die plaaslike inwoners het onwettige Chinese vissersbote altyd die haaie in die omgewing met hul nette gevang om die vinne af te sny.
“Die afgelope klompie maande is die bote egter verwilder en daar is seker meer haaie wat weer in die omgewing rondswem,” het Twiss vertel.
Teen eergistermiddag laat het ’n helikopter steeds laag langs die strande by Ponta d’Ouro en verder noord gevlieg en vakansiegangers is met ’n megafoon gewaarsku om uit die water te bly en te kyk of die haai opgespoor kon word.
Die Mosambiekse strande het nie haainette nie.
- Beeld