Guy Kebble vloek vir Agliotti in hof
2010-02-02 09:46
Marga Ley
Johannesburg - By hof 4B in die Suid-Gautengse hooggeregshof in Johannesburg het al die gewese goeie vriende en samewerkers hul bes probeer om mekaar totaal te ignoreer.
Die hoofkarakter wat die meeste geïgnoreer is en die meeste geïgnoreer het, was Glenn Agliotti.
Hy het gister in dieselfde hof verskyn (in verband met die moord op die mynmagnaat Brett Kebble) as waar Jackie Selebi, in wie se korrupsiesaak hy die hoofgetuie was, verskyn.
Dit is aan administratiewe prosedures te wyte, maar erg ironies.
Agliotti en Selebi – eens vriende “finish en klaar” – ignoreer mekaar al lankal.
Gister het Agliotti Guy Kebble, die vermoorde se broer, ook geïgnoreer. Hy het Mikey Schultz, Nigel McGurk en Faizel Smith, wat erken het hulle het die sneller getrek in die moord op Kebble en wat nou staatsgetuies teen hom is, ook die koue skouer gegee.
Hul eertydse baas en ook nou staatsgetuie, Clinton Nassif, het eenkant gesit en probeer lyk of hy niemand ken nie.
Die enigste mens wat niemand geïgnoreer het nie, was Guy Kebble, oud-Springbokstut. Uit die tweede ry van die openbare galery het hy Agliotti getreiter: “Kyk vir my, Glenn, toe kom, kyk vir my.” Agliotti het nie beweeg nie. “Kom nou Glenn, kyk vir my. Jou f–n d–s!”
Hy het nie doekies omgedraai nie. “Agliotti is etter. Haal my net so aan. Hy is etter, dik ondeursigtige etter.
“Miskien het my broer foute gemaak en kon hy in finansiële moeilikheid gewees het, maar ek weet hy sou nie selfmoord pleeg nie, veral nie op dié manier nie. Om jouself sewe keer te laat skiet?
“Jy weet, ’n mens kan dit oorleef! Hy sou eerder een skoot in die kop gevat of gas gebruik het. Maar hierdie ding van bygestaande selfmoord is onsin,” het Guy Kebble gesê.
Volgens hom het hy die saak gister bygewoon om geregtigheid te sien seëvier. Hy glo dit kan gebeur “as die aanklaers hul werk goed doen”.
“En hulle moet daai John Stratton uit Australië laat uitlewer. Hulle moet dit kan doen. ’n Land wat die Wêreldbeker-sokkertoernooi kan aanbied, moet dit ook kan doen.”
Die staat het aangedui hulle wil Stratton, ’n oudsakevennoot van Brett Kebble, saam met Agliotti aankla.
Die eerste van sowat 50 staatsgetuies word na verwagting môre geroep.
Die saak is uitgestel tot môre, wanneer die verhoor na verwagting sal begin. Agliotti word ook aangekla van sameswering tot die opspraakwekkende moord op Brett Kebble in September 2005.
Kebble is verskeie kere agter die stuur van sy motor in Melrose, Johannesburg, geskiet en is op die toneel dood.
- Die Burger