Gure weer saai ontwrigting en eis lewe
2010-05-11 07:02
Kaapstad - Die gure weer wat die Wes-Kaap sedert Saterdagnag teister, het gister ’n lewe geëis toe ’n twee maande oue baba dood is nadat die motor waarin hy, sy ouers en broer gery het in swaar reën in ’n botsing betrokke was.
Die baba se ma (31) is in ’n kritieke toestand in die Milnerton Medi-Clinic, het me. Vanessa Jackson, ER24-woordvoerder, gesê. Sy pa en broer ly aan skok.
In dié gesinstragedie was die baba steeds in sy babastoeltjie op die voorste passasiersitplek vasgegespe toe hy weens kopbeserings op die toneel gesterf het.
Die ongeluk het gister net voor 15:00 naby die Hugenote-tonnel aan die Paarl se kant gebeur.
Volgens Xenophone Wentzel, provinsiale verkeerswoordvoerder, het die Mitsubi-shi waarin dié gesin van Somerset-Wes was reg van voor teen ’n Audi gebots wat op die nat pad gegly het.
Die gesin in die Mitsubishi het van die tonnel in die rigting van die Paarl gery. Die bestuurder van die Audi, wat alleen in die motor was, is ongedeerd. Dié man van Constantia het gesê dit het hard gereën toe sy motor op pad na Worcester gegly en voor die aankomende verkeer beland het.
Die polisie het die gesin se identiteit weerhou omdat die pa laataand nog aan erge skok gely het en nie geweet het sy baba is dood nie.
Gistermiddag is die rampbestuurseenheid van die Kaapse stadsraad genoop om komberse en warm kos uit te deel by die Liberty- en Overcome-uitbreidings naby Seawinds nadat inwoners erg deur die reën en koue verontrief is, berig Marelize Barnard.
Wilfred Solomons-Johannes, waarnemende hoof van rampbestuur, het gesê weens die deurdringende reën het die watertafel gestyg en was 50 strukture deurnat. Hulp is aan sowat 200 mense gebied.
Intussen het die Weerdiens gewaarsku nog ’n kouefront sal die Kaap na verwagting Donderdag tref.
Stella Nake, weervoorspeller van die Kaapse weerkantoor, het gewaarsku onstuimige seetoestande met deinings van meer as 5 m word tussen Kaap Columbine en Plettenbergbaai verwag.
- Die Burger
- Die Burger