Gure weer laat ou skip aan KZN-kus strand
2011-07-27 09:00
Durban - Te midde van gure weer was bergingswerkers aan die KwaZulu-Natalse noordkus Dinsdag in ’n stryd teen tyd gewikkel om ’n gestrande vragskip onder sleeptou te kry om te keer dat die kus dalk met honderde ton diesel besoedel word.
Verskeie sleepbote is in die bergingspoging aan die kus by Salt Rock gebruik waar die MT Phoenix Dinsdagoggend in stormsee gestrand het.
Teen Dinsdagmiddag is ’n groot helikopter van Nelspruit ontbied in ’n poging om toue van sleepbote vanuit die lug op die Phoenix neer te laat, het kapt. Nigel Campbell, streekbestuurder van die Suid-Afrikaanse Maritieme Veiligheidsowerheid (Samsa), gesê.
Die Suid-Afrikaanse Weerdiens het golwe van tussen 4,5 m en 5 m aan die KwaZulu-Natalse kus vir die nag voorspel terwyl ’n koue front oor die provinsie beweeg.
Die Phoenix, wat onderweg na ’n skrootwerf in Indië is om daar gesloop te word, het meer as twee weke gelede al naby Oos-Londen in die moeilikheid geraak toe sy hoofenjin gestaak en dit ’n paar seemyle van die strand op sleeptou geneem moes word.
Samsa het daarna geëis dat die Phoenix Suid-Afrika se gebiedswater verlaat om die gevaar van besoedeling af te weer.
Volgens Campbell het die eienaars van die Phoenix, wat op eie stoom na Indië op pad was, daarna talle beloftes gemaak om ’n sleepboot te huur om die ou vragskip eerder op sleeptou te neem.
Toe daar niks van kom nie, het Samsa ’n tussentydse hofbevel in die hooggeregshof in Durban bekom om op die Phoenix beslag te lê en veilig daarvan ontslae te raak.
Die skip het aan die noordkus voor anker gelê totdat die finale hofbevel na verwagting op 4 Augustus toegestaan sou word.
In eergisteraand se stormweer het die skip se ankers begin sleep en het dit ondanks verskeie pogings in die nag om dit op sleeptou te neem, Dinsdag gestrand.
Die Indiese bemanning is om veiligheidsredes met ’n Oryx-helikopter van die lugmag van die skip opgepik terwyl bergingswerkers neergelaat is.
Hoewel die skip se romp teen Dinsdagmiddag geen skade gehad het nie, het spanne op die strand gereed gestaan om besoedeling te bekamp.
“As ’n skip in gure weer gestrand is, kan jy nooit met sekerheid sê die romp is buite gevaar nie,” het Campbell gesê.
Volg Nuus24 op Twitter.
- Volksblad