Gryp grond soos Zim, sê Malema
2010-04-09 09:25
Johannesburg – Grond in Suid-Afrika moet soos in Zimbabwe “militant en radikaal” in beslag geneem word, sê Julius Malema, die ANC-jeugleier.
Hy het vandeesweek van ’n besoek aan dié buurland teruggekeer.
Die ANC het gisteraand dadelik wal gegooi teen Malema se opruiende uitlatings en gesê wat hy voorstel is nie ANC- of regeringsbeleid nie.
Dit kan net beleid word as Malema dit aan die ANC se nasionale raadsvergadering later vanjaar, asook die nasionale kongres en beleidskongres in 2012, voorlê en al drie dit aanvaar, het Jackson Mthembu, ANC-woordvoerder, gesê.
Mthembu stem saam met Malema dat die beginsel van gewillige koper en verkoper nie suksesvol is nie en herbekyk moet word.
Hy het beklemtoon daar is ’n lang proses voordat die regerende party sy beleid verander of nuwes aanvaar.
“Die ANC-jeugliga het nog geen voorleggings oor grondhervorming aan die ANC gedoen nie,” het hy gesê.
Malema en sy gevolg beoog egter dat so ’n beleid van “militante en radikale” nasionalisering van grond en myne by die party se nasionale algemene raadsvergadering in September bespreek sal word.
Hy het Donderdag gesê dié soort grondhervorming moenie met geweld gepaard gaan nie.
Malema meen Zimbabwe se grondhervorming is ’n groot sukses. “Hulle het inheemse mense baie grond gegee ...
“Grond is van sowat 4 000 wit rassistiese boere na meer as 300 000 boere oorgedra wat kos vir hulself en Zimbabwe in die algemeen produseer,” het die jeugleier gesê.
Hendrik Olivier, uitvoerende hoof van Zimbabwe se kommersiële boere-unie (CFU), betwis dié syfers en meen baie min Zimbabwiërs wat grond benodig het, het dit sedert 2000 bekom.
“Die grond wat by boere afgevat is, lê nou leeg en waar landerye eens was, groei gras en vuilgoed.”
Olivier het gesê die meeste van die grond wat van hulle afgevat is, is nou in die hande van politici, regeringsamptenare, weermag- en polisielede, asook ryk sakelui.
Hy het egter beklemtoon die grondhervorming in Suid-Afrika moenie met die situasie in Zimbabwe vergelyk word nie.
“In Suid-Afrika praat die regering nog met die landbouverenigings,” het Olivier gesê.
Malema meen Suid-Afrika het ’n militante leier nodig wat sal toesien dat ekonomiese transformasie en grondhervorming gebeur.
Volgens hom moet die ANC nie bang wees dat buitelandse beleggers uit die land sal onttrek nie en moet hulle met sulke soort grondhervorming voortgaan.
“Ons moet radikaal en militant wees, maar nie gewelddadig nie. Ons sal nooit enige vorm van geweld ondersteun nie.”
Malema meen die staat kan dieselfde aanslag met grondbesit hê as toe hy voorheen deur wetgewing op minerale regte beslag gelê het.
“Ons sal grond vat ... deur middel van demokratiese metodes.”
– Beeld