Gru-toneel ná ligte vliegtuig in KZN neerstort
2012-09-13 21:11
Kaapstad – Nooddienspersoneel het op ‘n gru-toneel afgekom toe hulle uitgeroep is ná 'n ligte vliegtuig naby Cato Ridge, KwaZulu-Natal, neergestort het.
Oproepe oor ‘n vliegtuigongeluk in die Vallei van Duisend Heuwels het om 17:30 begin deurkom, en paramedici van Durban en Pietermaritzburg het hulle na die toneel gehaas, het Vanessa Jackson, woordvoerder vir ER24, gesê.
Die toneel was ontoeganklik per voertuig en paramedici en ‘n brandweerbeampte moes vir ‘n uur en ‘n half by die berg op stap voor hulle die wrak van ‘n ligte vliegtuig gevind het, het Jackson gesê.
Die vliegtuig was steeds aan die brand en erg beskadig.
“Hulle kon net die verkoolde oorskot van drie mense sien en weens hulle erge brandwonde kon hulle nie uitmaak of dit kinders of volwassenes, of mans of vrouens is nie,” het Jackson bygevoeg.
“Dit is nog nie duidelik wat die oorsaak van die ongeluk is nie, maar plaaslike inwoners sê dat daar swart rook uit die vliegtuig geborrel het voor dit neergestort het.”
Dit is die tweede vliegongeluk in KZN die afgelope week. ‘n Ander ligte vliegtuig het Woensdag naby Pietermaritzburg neergestort.
– Nuus24
– Volg Nuus24 op Twitter
