Gru-ongeluk eis 14
2009-07-27 08:43
Plettenbergbaai - ‘n Ongeluk waarin twee voertuie betrokke was het 14 lewens geëis en een persoon in ‘n ernstige toestand gelaat.
Die ongeluk het Sondagaand op die N2 tussen Plettenbergbaai en The Cracks by Keurboom Hoogte gebeur.
Toe nooddienste op die toneel kom was 13 mense reeds dood. Een ander persoon is oppad na die hospitaal in die ambulans dood.
Die enigste oorlewende is in ‘n ernstige, maar stabiele toestand deur ‘n ER24 ambulans na die Knysna Provinsiale Hospitaal geneem.
Volgens bewering het die twee voertuie, ‘n Audi en ‘n Volkswagen Polo, kop-aan-kop gebots.
Die meerderheid van die mense was vasgevang in hul motors.
Die Audi het aan die brand geslaan en die nooddienswerkers moes spook om die vlamme te blus.
Verskeie nooddienste was op die toneel en die polisie ondersoek die ongeluk.
- ER24