Groot hospitaal se toekoms in weegskaal

2013-01-29 13:37

Durban – KwaZulu-Natal se provinsiale regering sal Woensdag ‘n aankondiging maak oor die toekoms van die stad se 103 jaar oue McCord Hospitaal.

Sibongiseni Dhlomo, LUR vir gesondheid, het gesê ‘n ooreenkoms moet nog met McCord Hospitaal bereik word.

Die hospitaal se bestuur het twee weke gelede gesê hulle gaan die fasiliteit in Maart sluit, ná die provinsie se departement nie daarin kon slaag om die hospitaal in te lig of hy ‘n subsidie sal kry nie.

McCord het in 2011/12 ‘n subsidie van R70 miljoen ontvang.

Dr. Sibongile Zungu, hoof van KwaZulu-Natal se departement van gesondheid, het verlede week gesê ‘n besluit oor ‘n subsidie vir die hospitaal is nog nie gemaak nie.

Sy het op ‘n mediakonferensie gesê ‘n komitee sal vandeesweek vergader om die hospitaal se subsidie vas te stel.

McCord is een van die grootste hospitale in KwaZulu-Natal. Die fasiliteit bedryf ook die land se grootste MIV-sorg- en behandelingsprogram.

Volg Nuus24 op Twitter

- SAPA