Groot Gat Godin laat Joost swymel
2010-03-21 08:59
Johannesburg - Die oud-Springbokkaptein Joost van der Westhuizen
het homself gisteraand in die geselskap van ses welbedeelde vroue begewe
toe hy vanjaar se Groot Gat Godin-kompetisie aangebied het.
“Hulle
is mense met wonderlike persoonlikhede,” het hy vroeër die middag
tydens ’n fotosessie oor die finaliste gesê.
Om vir die
kompetisie te kwalifiseer moet ’n vrou klere groter as ’n nommer 18 dra.
Me.
Corné Grobler, betrokke by die organisering van dié kompetisie, het
gesê deelnemers kan getroud of ongetroud wees, moet goed versorg en
spontaan wees, en moet as ambassadeurs vir die groter vrou optree.
Van
der Westhuizen was tydens die fotosessie baie beslis oor wat mag en wat
mag nie: Hy was glad nie te vinde vir voorstelle dat die meisies
teenaan hom staan of aan hom hang nie.
Hy het wel baie positiewe
dinge oor hulle te sê gehad.
“Hulle is mense net soos ons.
Hulle is positief, en dis waaroor dit gaan; dit maak nie saak of jy
groot of klein is nie.”
Van der Westhuizen se vrou, Amor Vittone,
het die choreografie vir die kroning behartig.
Sy het die
finaliste vroeër gistermiddag touwys gemaak oor hoe hulle gisteraand op
die verhoog moes optree.
Sy het gesê sy het hulle as baie
spontaan beleef.
“Daar is by hulle geen pretensie nie en dis ook
hoe die kroning moet wees – nie ’n streng, vooraf uitgewerkte vertoning
nie.
“Hulle is vroue wat gemaklik met hul voorkoms, vriendelik en
baie selfversekerd is.
“Hulle hou van wat hulle doen en ek het
hulle net ’n paar ekstra passies geleer,” het Vittone gesê.
Teen
druktyd was die wenner nog nie aangewys nie.
Die kompetisie is
deel van die Groot Gat-kunstefees wat nog vandag en môre voortduur.
-
Rapport