Grondwethof weier Moodley se appèlaansoek
2010-08-05 10:01
Die Burger
Kaapstad - Die einde van die pad het Woensdag finaal aangebreek vir Donovan Moodley, moordenaar van die Johannesburgse student Leigh Matthews.
Hoofregter Sandile Ngcobo en die ander tien regters van die konstitusionele hof het eenparig Moodley se aansoek om appèl teen sy lewenslange vonnis verwerp. Hulle het gesê daar is geen vooruitsig op sukses met ’n appèl nie.
Nou is daar geen ander regsinstansie meer waartoe Moodley hom kan wend nie.
Daarmee het die konstitusionele hof ’n einde gebring aan een van die mees opsienbarende hofsages.
Moodley het aanvanklik in die Suid-Gautengse hooggeregshof in Johannesburg erken dat hy Matthews ontvoer, ’n losprys van haar pa gekry en haar daarna “op die ingewing van die oomblik” op ’n verlate plek buite Johannesburg in die kop geskiet het.
Toe het Moodley skielik bolmakiesie geslaan en gesê hy wil ’n herverhoor hê. Dit is geweier. Ook die appèlhof het sy aansoek om appèl van die hand gewys.
In die konstitusionele hof wou Moodley nie meer teen sy skuldigbevinding appèl aanteken nie, maar het hy gesê dat hy pleks van lewenslank net 15 jaar tronkstraf moes gekry het omdat die moord op Matthews nie beplan was nie.
Statutêr word bepaal dat ’n moordenaar wat ’n moord beplan, vir lewenslank kwalifiseer, terwyl ’n onbeplande moord met hoogstens 15 jaar tronkstraf gestraf kan word. Die konstitusionele hof het ook beveel dat Moodley die regskoste van die appèlaansoek moet dra.
Oudbrig. Piet Byleveld, wat die saak destyds ondersoek en Moodley in hegtenis geneem het, het in reaksie gesê hy hoop Moodley “kom nou tot ruste en aanvaar sy lot”.
Hoewel hy afgetree is, glo hy steeds dat Moodley medepligtiges gehad het. Hy sal stilweg voortgaan om hulle te soek.
- Die Burger