Groente: Pryse 40% op in 2009
2010-04-26 12:23
Kobus Smit, Lanbou.com
Johannesburg - Groentepryse in die algemeen het in 2009 gemiddeld met 40% toegeneem terwyl dit in 2008 met 3% gedaal het. Van die vernaamste produkte wat tot die prysstyging bygedra het, is aartappels wat met meer as 60% toegeneem het, en tamaties met 22%.
In dié artikel word gekyk na die verkope en pryse van aartappels en tamaties op die twee vernaamste markte in Gauteng - die Pretoria en Johannesburg Varsproduktemarkte.
Aartappels
Die verkope van aartappels op Pretoria en Johannesburg se varsproduktemarkte het in 2009 afgeneem in vergelyking met 2008. Pryse het egter in die tydperk drasties gestyg.
Die hoeveelheid aartappels wat in 2009 op die Pretoria Varsproduktemarkverkoop is, is 8,5% minder as die vorige jaar. Vanaf 2005 tot 2009 het die verkope van aartappels jaarliks geleidelik toegeneem met die uitsondering van verlede jaar toe daar die afname was. In 2005 is net meer as 132 000 ton verkoop teenoor 151 000 ton in 2009. Dit is ‘n toename van 14%. Die grootste verkope was egter in 2008 toe meer as 165 000 ton van die hand gesit is.
Pryse op die mark het egter gewissel. Nadat dit in 2006 en 2008 effens gedaal het ten opsigte van die voorafgaande jare, het dit in die daaropvolgende jare, drasties toegeneem. In 2007 het die prys met 30% gestyg van R16,95 per 10kg sakkie tot R22,11 per 10kg sakkie. In 2009 was die styging dubbel so groot toe die prys met 62% toegeneem het van R20,31 per 10kg sakkie tot R 32,97 per sakkie.
Lees meer op Landbou.com.