Griekwastad-verdagte vra vir uitstel
2012-08-24 12:30
Kimberley – Die verdedigingspan van ‘n minderjarige seun wat van die moord op die Steenkamp-gesin aangekla word, het die Griekwastad-kinderhof vir uitstel in sy borgtogaansoek gevra.
Willem Coetzee, die seun se regsverteenwoordiger, het vir uitstel gevra nadat die staat dokumente, wat ‘n 22 bladsy lange beëdigde verklaring, foto-albums en verslae van deskundiges insluit, aan hom oorhandig het.
Hy het aan landdros OS Mazwi gesê hy is nie voorbereid nie, aangesien hy die dokumente eers Vrydagoggend gekry het.
Coetzee het gevra dat die saak tot Maandag uitgestel word sodat hy die staat se bewyse kan bestudeer. Hy sê sy kliënt sal benadeel word indien die saak dadelik moet voortgaan.
Hannes Cloete, staatsaanklaer, sê hy gee nie om as die verdediging meer tyd wil hê om voor te berei nie, maar hy meen ‘n uitstel tot Maandag is onnodig.
Mazwi het die sitting tydelik laat verdaag sodat Coetzee die dokumente kon bestudeer. Hy sal dan besluit of ‘n uitstel moontlik is.
‘n Minderjarige seun is vroeër vandeesweek by ‘n Bloemfonteinse skool in hegtenis geneem in verband met die moord op Deon, Christelle en Marthella Steenkamp.
Die enigste oorlewende van die gesin, Don, het gesê hy was buite in die pakskuur toe hy die skote gehoor het.
Volg Nuus24 op Twitter
- SAPA
