Griekwastad-tiener hoor later oor skool

2012-09-15 07:31

Bloemfontein – Die Vrystaatse hooggeregshof sal volgende week 'n saak tussen die voog van die seun wat van die moord op die Steenkamp-gesin aangekla word, en prominente Bloemfonteinse skool aanhoor.

OFM het verneem dat 'n besluit Vrydag buite die hof tussen die partye geneem is dat die saak eers Donderdag sal voorkom.

‘n Familievriend van die moordbeskuldigde het vroeër aan Volksblad gesê daar is geen rede hoekom die tiener nie na sy skool kan terugkeer nie.

Die skool se beheerliggaam het vroeër besluit om die seun nie tot die skool of skoolkoshuis toe te laat terwyl hy verhoorafwagtend is nie.

Die tiener is verlede week ná ’n week in aanhouding deur landdros Oswald Mazwi in die Griekwastad-landdroshof op borgtog vrygelaat.

Hy is vroeër in hegtenis geneem in verband met die moorde op Deon Steenkamp, sy vrou, Christelle, en hul dogter, Marthella. Hulle is op Goeie Vrydag op hul plaas, Naauwhoek, doodgeskiet.

Hy sal weer op 1 Oktober in die hof verskyn vir die vasstelling van ’n verhoordatum in die hooggeregshof.

Volg Nuus24 op Twitter