Griekwastad-moorde 'nie gewone plaasaanval'
2012-08-24 16:38
Kaapstad – Die staat het verder uitgebrei oor dokumente wat hy aan die Griekwastad-kinderhof in verband met die moord op die Steenkamp-gesin ingedien het.
Sapa berig die staat het Vrydagoggend dokumente, wat ‘n 22 bladsy lange beëdigde verklaring, foto-albums en verslae van deskundiges insluit, aan Willem Coetzee, die moordverdagte se regsverteenwoordiger, oorhandig.
Jacques Steenkamp, ‘n verslaggewer vir Rapport, het vanuit die hof oor die verrigtinge getweet.
Hy berig kol. Dick de Waal, ‘n ondersoekbeampte, sê dié opspraakwekkende moorde was geen gewone plaasaanval nie, want daar was motors, elektroniese ware, vuurwapens en geld agtergelaat.
De Waal het vroeër gesê die moordverdagte het ná die moorde bloedspatsels en krapmerke op hom gehad.
‘n Minderjarige seun is vroeër vandeesweek by ‘n Bloemfonteinse skool in hegtenis geneem in verband met die moord op Deon, Christelle en Marthella Steenkamp.
Die enigste oorlewende van die gesin, Don, het gesê hy was buite in die pakskuur toe hy die skote gehoor het.
Volg Nuus24 op Twitter
- Nuus24
