Griekwastad: 'Tronkstraf nie uitgesluit'
2012-08-22 08:08
Bloemfontein – Johan Bezuidenhout, adjunk-direkteur van openbare vervolging in die Oos-Kaap en kenner van die Wet op Kindergeregtigheid, meen die minderjarige wat in verband met die opspraakwekkende Griekwastad-moorde vasgetrek is, sal waarskynlik in polisie-aanhouding bly tot sy hofverskyning.
Die seun is Dinsdagoggend by sy skool in Bloemfontein in hegtenis geneem en sal Donderdag na verwagting in ‘n hof verskyn.
‘n Betroubare bron het vroeër aan OFM gesê die kind is in die skoolhoof se kantoor vasgetrek.
Bezuidenhout sê selfs al word die saak na die hooggeregshof verwys, sal dieselfde prosedures as in ‘n kinderhof geld.
Hy meen dat indien die minderjarige wel skuldig bevind word, tronkstraf moontlik opgelê kan word.
OFM berig ‘n informele voorlopige verhoor met al die betrokke partye, asook ‘n maatskaplike werker, sal gehou word.
Gedurende hierdie verrigtinge sal besluit word of die beskuldigde vir ‘n afleidingsprogram kwalifiseer of verder tereg sal staan in ‘n kinderhof.
Die tiener kan moontlik ook ‘n gedeelte van sy vonnis in ‘n jeugsentrum uitdien, waar hy ná sy 21ste verjaardag die res van sy vonnis in die tronk moet uitdien.
Deon, Christelle en Marthella Steenkamp is vroeër vanjaar op Goeie Vrydag op hul plaas Naauwhoek doodgeskiet.
Volgens die polisie het die enigste oorlewende van die gesin, Don, gesê hy was buite in die pakskuur toe hy die skote gehoor het. Hy het die huis binnegehardloop en op sy ouers en susters se lyke in die TV-kamer afgekom, het Volksblad vroeër berig.
Volg Nuus24 op Twitter
