Griekwastad-moorde: Tiener weer in hof
2012-09-03 07:06
Johannesburg – Die borgtogaansoek van 'n 16-jarige seun wat verdink word van die gru-moorde op 'n gesin van Griekwastad, sal Maandag in die kinderhof op dié dorp aangehoor word.
Die tiener is in hegtenis geneem in verband met die moorde van Deon Steenkamp (44), sy vrou, Christelle (43) en die paartjie se 14-jarige dogter Marthella.
Tydens sy laaste hofverskyning het Willem Coetzee, vir die verdediging, aan die hof gesê daar is geen direkte bewyse wat die tiener met die moord, wat op 6 April plaasgevind het, verbind nie.
"Niks dui daarop dat hy die misdade gepleeg het nie. Dit is alles omstandigheidsgetuienis, selfs die DNS," het Coetzee aangevoer.
Coetzee het kol. Dirk de Waal, ondersoekbeampte in die saak, onder kruisverhoor geneem. De Waal hou egter vol dat die bewyse waterdig is.
Die seun se regsverteenwoordiger het verder gesê die staat en De Waal het die grusaamheid van die moorde oorbeklemtoon.
Coetzee het gesê die tiener is ten minste, as 'n kind, geregtig op borgtog. Hy het gesê die daar word van 'n polisieman verwag om in sy ondersoek te glo, maar die ondersoekbeampte is bevooroordeeld.
Hannes Cloete, staatsaanklaer, het die verdediging se getuies ten gunste van borgtog, as subjektief beskryf. Familielede van die tiener en sy maatskaplike werker is die getuies.
– Volg Nuus24 op Twitter
- SAPA
