Griekwastad-moorde: Tiener tree 'anders' op
2012-08-22 06:45
Bloemfontein – Die gedrag van die tiener wat verdink word van die skokmoorde op 'n gesin van Griekwastad het baie verander, het 'n kennis gesê.
Volgens 'n kennis was die 16-jarige vroeër skugter en skaam, maar hy het baie selfvertroue gekry. Hy was nou “babbelend” en “voor op die wa”, het Volksblad berig.
“Hy het gesê as hy 16 word, gaan hy die skool verlaat en gaan hy boer. Niemand gaan vir hom sê wat hy moet leer nie.”
Die kennis het gesê die seun sou vroeër stil sit en vir lang tye net voor hom uitstaar, maar nou lag, stoei en korswil hy met sy maats en ander mense.
“Hy babbel nou verskriklik. Hy is nou só vol selfvertroue jy kan hom amper nie stilmaak nie. Meisies drom om hom saam. Hy het bekend geword en dit lyk of hy die aandag geniet. Dit is half sad, ja.”
Die seun is Dinsdag kort ná 09:00 by sy skool in hegtenis geneem.
Kapt. Cherelle Ehlers, polisiewoordvoerder, het bevestig die Valke het Dinsdagoggend ’n minderjarige in Bloemfontein in hegtenis geneem.
Deon (44) en Christel Steenkamp (43) en hul dogter, Marthella (14) is op 6 April op die plaas Naauwhoek, sowat 9 km buite die dorp, vermoor.
– Volg Nuus24 op Twitter
