Griekwastad: Tiener het inhegtenisname verwag

2012-08-23 16:56

Griekwastad – Die minderjarige seun wat van die moord op die Steenkamp-egpaar en hul dogter aangekla word, het aansoek om borgtog gedoen.

Verskeie joernaliste en mediabronne het vanuit die hof getweet dat die verdagte in die Griekwastad-landdroshof deur familielede omring is toe die moordverhoor amptelik begin het.

Rapport het op die sosiale netwerk berig  ‘n maatskaplike werker het eers oor die beskuldigde se geestestoestand getuig, maar die media mag nie dié getuienis bygewoon het nie.

Die staat beweer die minderjarige seun het die moorde vooraf beplan en het die beskuldigde se aansoek om borgtog teengestaan.

Daarna moes die beskuldigde se advokaat buitengewone omstandighede in die hof vir sy borgaansoek bewys.

Luidens ‘n tweet van Rapport is die tiener se prokureur reeds op 23 Mei ingelig dat sy kliënt ‘n verdagte is.

Die seun is Dinsdag by sy skool in Bloemfontein in hegtenis geneem, het Volksblad berig.

Hy het die inhegtenisname glo verwag en sy voog en ‘n sielkundige het hom vir dit voorberei.

Volksblad berig dat die hof verdaag het nadat die verdagte se voog getuig het. Volgens hom het hulle ‘n goeie verhouding gehad.

Hy het bygevoeg dat dit onder die omstandighede goed gaan met die seun.

‘n Maatskaplike werker het getuig dat dit nadelig sal wees as die beskuldigde nie kan terugkeer skool toe nie. Die tiener het aangedui dat hy wil teruggaan, het ‘n getuie gesê.

Die seun sal waarskynlik by die plaaslike polisiestasie se selle aangehou word tot Vrydag se formele borgaansoek.

– Volg Nuus24 op Twitter