Griekwastad: Staat appelleer teen borgtog
2012-09-04 07:32
Griekwastad – ‘n Plaaslike radiostasie het verneem dat die staat teen die borgtoguitspraak van die seun wat in die Griekwastad-landdroshof gehoor is, gaan appelleer.
Regter Spiwo Mazwi het Maandag borgtog van R5 000 aan die 16-jarige seun toegestaan. Die minderjarige moordbeskuldigde is ook in die sorg van sy voog vrygelaat.
Nadat JJ Cloete, staatsaanklaer, met die direkteur van Openbare Vervolging vergader het, het hulle besluit om teen die uitspraak te appelleer, het OFM berig.
Die seun word beskuldig van die moorde op Deon, Christelle en Marthella Steenkamp wat in April vanjaar in die gesin se plaashuis doodgeskiet is.
Mazwi het in die hof gesê dat die belange en beskerming van die kind die meeste gewig moet dra.
Nadat die borgtog toegestaan is, het die seun sy familie en vriende in die hof omhels.
Volgens OFM het gemeenskapslede, wat buite die hof saamgedrom het, hul ontevredenheid met die uitspraak teenoor die media uitgespreek. Baie van hulle het gesê dat die seun 'n gevaar vir die samelewing is.
Volg Nuus24 op Twitter
