Prokureur weet nie van 'seksuele misdrywe'

2012-08-27 13:07

Bloemfontein – Die regspan van die minderjarige seun wat aangekla word van die Griekwastad-moorde sê hulle voel positief oor die seun se borgaansoek, ten spyte van nuwe bewerings wat onlangs kop uitgesteek het.

OFM berig die seun se prokureur, Stoffel de Jager, sê hulle dra geen kennis van enige seksuele misdrywe soos Sondag in ‘n nasionale weekblad beweer is nie.

De Jager sê indien iets sou opduik wat relevant tot die borgaansoek kan wees, sal hul regspan dit voor die hof plaas.

Hy sê egter dit is onwaarskynlik dat so iets na vore sal kom en dat die landdros reeds al die nodige inligting het om ‘n besluit rakende die borgaansoek te neem.

Die radiostasie berig Cherelle Ehlers Noord-Kaapse polisiewoordvoerder, wou ook nie op die bewerings reageer nie, en het gesê dat die polisie volstaan by wat in die hof gesê is.

Die seun, wat daarvan aangekla word dat hy Deon, Christel en Marthella Steenkamp op 6 April op hul plaas doodgeskiet het, is tans in aanhouding in die Galeshewe-polisiestasie in Kimberley.

Hy sal volgende Maandag weer voor die Griekwastad-landdroshof verskyn.

Volg Nuus24 op Twitter