Griekwastad: Ooreenkoms met skool bereik

2012-09-19 20:24

Bloemfontein – Die tiener wat van die moord op die Steenkamp-gesin aangekla word en sy hoërskool in Bloemfontein het buite die hof geskik.

OFM berig die twee partye sou Donderdag in die Bloemfonteinse hooggeregshof verskyn het, nadat die moordbeskuldigde se voog hom na die hof gewend het om die seun terug by die skool te kry.

Volgens die minderjarige se prokureur, Stoffel de Jager, is ‘n ooreenkoms met die skool bereik, wat bepaal dat die seun tuisonderrig sal ondergaan terwyl die skool alle nodige leermateriaal aan hom sal verskaf.

Die radiostasie berig die seun bly ‘n leerling van die skool en kan ook onderwysers kontak indien hy enige vrae omtrent sy skoolwerk het.

Volgens De Jager verskil hierdie ooreenkoms van die oorspronklike onderhandelinge met die skool, maar hy wou nie verdere besonderhede verskaf nie.

Die seun is vroeër die maand borgtog van R5 000 in die Griekwastad-landdroshof toegestaan.

Hy word daarvan beskuldig dat hy Deon, Christel en Marthella Steenkamp op Goeie Vrydag op hul plaas, Naauwhoek, doodgeskiet het.

Volg Nuus24 op Twitter