Griekwastad: ‘Moord moes verkragting wegsteek’
2013-02-24 07:50
Johannesburg – Die minderjarige seun wat weens die moorde op die Steenkamp-egpaar en hul dogter teregstaan, het haar verkrag en almal doodgeskiet om te voorkom dat die waarheid uitkom, beweer 'n bron na aan die ondersoek.
Deon Steenkamp (44), sy vrou, Christel (43), en hul dogter, Marthella (14), is verlede jaar op Goeie Vrydag vermoor en het die gemeenskap van Griekwastad geruk, berig Rapport.
Die staat het Maandag aanklagte van verkragting en regsverydeling by die klagstaat gevoeg.
Volgens die polisiebeampte was die seun en Marthella moontlik alleen op die familie-plaas, Naauwhoek, tussen 12 en 24 uur voor die moorde.
“Ons het lank vermoed wat die moontlike motief kon wees, maar dit is nou op rekord,” sê die bron.
Tydens Marthella se lykskouing is gevind sy het verskeie beserings aan haar geslagsdeel opgedoen wat ooreenstem met iemand wat teen haar wil gepenetreer is.
Daar is glo ’n oppervlakkige skaafwond, asook interne beserings en “skeure”.
Die staat gaan glo aanvoer die seun het Marthella verkrag, waarna sy haar ouers óf daarvan wou vertel óf reeds vertel het en dat die seun glo die .357-rewolwer uit die kluis van die Steenkamps gaan haal het en op die familielede losgebrand het.
“Deon was ’n stoeier en ek glo as hy uitgevind het, sou hy daai seun self vermoor het,” sê die bron.
Die regsverydeling-aanklag teen die seun spruit uit die seun se “doelbewuste” leuens oor die gebeure.
– Volg Nuus24 op Twitter
