Greyling veilig terug by die huis
2010-03-10 10:20
Johannesburg – Nick Greyling, die klankingenieur van SuperSport wat in Nigerië ontvoer is, het Woensdagoggend veilig in Suid-Afrika aangekom, het ‘n woordvoerder vir die familie gesê.
“Hy het Woensdagoggend vanaf Lagos hier aangeland,” het Johan Russouw gesê.
“Hy is baie, baie moeg en uitgeput, maar dit gaan goed onder die omstandighede.”
Volgens Russouw, Greyling se skoonpa, is die familie baie dankbaar teenoor almal wat gehelp het om sy vrylating te verseker.
Greyling en sy vrou sal ‘n rustige dag saam spandeer.
“Die eerste ding wat hulle nou gaan doen is om saam ontbyt te eet,” het Russouw gesê.
“Sy jongste dogter het op haar pa se skoot gaan sit.”
Greyling en sy vrou het drie dogters van sewe, vier en een en ‘n half.
Russouw het bygevoeg dat SuperSport beplan om Woensdag ‘n persverklaring vry te stel, maar geen planne is gemaak vir Greyling om die media toe te spreek nie.
Die departement van internasionale betrekkinge en samewerking het Dinsdag gesê dat dit Greyling se keuse is om oor die voorval te gesels of nie.
Woordvoerder Nomfanelo Kota het geweier om kommentaar te lewer oor berigte deur AFP dat $100 000 (sowat R740 000) losprys vir Greyling se vrylating betaal is.
“Sover ek weet is geen losprys betaal nie. Sy vrylating is verseker deur samewerking deur die Nigeriese en Suid-Afrikaanse regerings, sowel as met die hulp van ‘n onderhandelingsparty, het Russouw gesê.
Greyling is Maandagaand vrygelaat.
- Sapa