Gratis hoër onderwys vir armes oorweeg
2012-01-13 06:51
Kaapstad – Die regering ondersoek die moontlikheid om gratis hoër onderwys te verskaf aan armes wat akademies daarvoor kwalifiseer.
Dr. Blade Nzimande, minister van hoër onderwys, het dit Donderdag na aanleiding van ’n vraag by die bekendstelling van die groenskrif oor hoër onderwys aangekondig.
Die vraag het gehandel oor die volhoubare bekostigbaarheid daarvan om beurse en lenings aan groot getalle brandarm studente te gee.
Nzimande het toegegee dat die nasionale studentehulpfonds onvoldoende is om in die vraag te voorsien en daarop gesinspeel dat die opgehoopte R10 miljard van die sektorale onderwys-en-opleidingsowerhede (setas) die nood kan help verlig.
Toe doen hy die groot aankondiging: “Die ANC het my departement gevra om kosteberamings te doen oor die mate waarin gratis hoër onderwys vir verdienstelike arm studente moontlik is.”
Volgens Nzimande sal die bevindings middel vanjaar voor die ANC se vyfjaarlikse nasionale beleidskonferensie dien.
Hy het toegegee dat die massifikasie van tersiêre onderwys die doelwit is, maar benadruk dat dit nie massifikasie van universiteitsonderwys beteken nie.
“Diegene wat op universiteit hoort, moet daardie geleentheid kry. Diegene wat vir ’n ambag opgelei behoort te word, moet die geleentheid kry om hul aanleg uit te leef.”
– Volg Nuus24 op Twitter
- Die Burger