Grafmoord-slagoffer se ma in hof
2012-10-31 08:32
Virginia – Die jong man wat verlede jaar in ‘n begraafplaas in Welkom vermoor is, se ma sal Woensdag na verwagting in die rondgaande hof op Virginia getuig.
Michael van Eck se ma, Henriëtte, sal binnekort getuig ter strafverswaring in Maartens van de Merwe se voorvonnisargumente.
Van der Merwe (26) is Dinsdag skuldig bevind op aanklagte van moord, roof met verswarende omstandighede en lykskending, nadat hy en sy verloofde, Chané van Heerden, Van Eck grusaam vermoor het.
OFM berig prof. Dap Louw, 'n forensiese sielkundige, sal ook die getuiebank betree.
Volgens die radiostasie is Van der Merwe deur die staatsaanklaer, Johan de Nysschen, vir antwoorde gepols oor waarom hy en sy verloofde Van Eck vermoor en opgesny het.
Van der Merwe het getuig dat hul rituele met self-mutilasie begin en tot katslagting oorgegaan het. In Februarie 2011 het hulle na 'n mens-slagoffer begin soek.
Die radiostasie berig Van der Merwe het aan die Van Eck-familie in die hof om verskoning gevra vir sy dade. Hy sê hy het geen genot daaruit geput om Van Eck te vermoor nie.
Van Heerden is reeds verlede jaar skuldig bevind en gevonnis.
Volg Nuus24 op Twitter
